في شرح معنى شباب الثورة

يعني إيه "شباب الثورة" بالنسبة للمواطن المصري الأصيل المتدين بطبعه و عضو حزب الكنبه؟!هيقولك المواطن الفصيح انهم الشباب "التوتو" بتوع الفيس بوك اللي عملوا ثورة يناير.. و اللي لما الثورة خلعت مبارك، الكل -تمحكاً في الثورة- سماهم الشباب النقي الطاهر بتاع ٢٥ يناير و الورد اللي فتح في جناين مصر! من بعد ما كانوا خاينين و عملاء للغرب أثناء الثورة!

الشباب الحر الغير منتمي لأي تيارات  سياسية هم المحرك الرئيسي لثورة يناير2011

حلو لحد كدة! هوب.. فجاءة.. بعد شهر واحد بقوا العلمانيين و الليبرالين الشواذ ، اللي عايزين أمك تقلع الحجاب- أيوووة أمك انت! و إذا بالمتدين بطبعه يحاربهم و يكفرهم في سبيل وصوله للسلطة و احتكاره ليها لوحده (بمنطق تاعتي انا لوحدي) و كان الحزين فاكر أنهم دول العقبة ف طريقه!! 
قوم إيه، هل النظام القديم هيتفرج؟؟ فَشَر دا حتي مايصحش يسيب مصر "تسقط".. ألف سلامة عليها م السقوط! ف تحالف مع أو قرطَّس (الشباب النقي الطاهر بتاع ٢٥ يناير) اللي كان بيقول عليه خاين و عميل و كنتاكي و انجليش لانجويتش في ميدان التحرير) علشان يزيحوا الاسلاميين م السلطة!و لما حصل المراد، دلوقتي بقي قال ايه؟! يا مواطنين يا شرفاء.. ٢٥ يناير مبقتش ثورة و شباب ٢٥ رجعوا خاينين و عملا لو تجرأوا و انتقدوا النظام الحالي (انظر الفشخ الاعلامي لخالد ابو النجا).. غير اللي فعلا في السجون لمجرد التعبير عن الرأي و نقدهم لبعض الأوضاع و القرارات السياسية و فشل النظام الحالي في محاربة الجماعات المتطرفة و العمليات الأرهابية ضد الجيش في سيناء، اللي قال عنها أحد قيادات تنظيم الإخوان: ستتوقف في الثانية التي يعود فيها مرسي للحكم!ف يقوم الاسلاميين و المتدين بطبعه بمناشدة شباب الثورة اللي كانوا في رأيه ( العلمانين و الليبرالين و الشواذ المخنثين) اعداء الاسلام انهم يتحدوا قال ايه في مواجهة ظلم و فشل العسكر .. ماعرفتكش أنا كدة بقى؟!بالذمة فيه بجاحة اكتر من كدة؟! دي كوميديا سودا
الجماعة دول عايزين السلطة لوحدهم، و دول عايزين السلطة لوحدهم... دول فشلة، و دول فشلة.. ناهيك عن الغباء و الجهل و التطرف في الجانبين!
و شباب الثورة "التوتو" آخرهم شوية كلام  هنا و شوية كلام هناك، اللهم إلا بعض الحالات الناجحة ف حياتها برة و جوة مصر!

بس هما ف ايديهم ايه أكتر من كدة؟ و محدش طايقهم ولا بيديهم نص فرصة.. و كل طرف بيعاملهم بانتهازية عشان يساعدوه ف التخلص م الطرف التاني!!ليه محدش عايز يبقى وطني بجد من غير شعارات فارغة و مايحتكرش السلطة له لوحدة! لا تبقي دينية و لا عسكرية... تبقى دولة مدنية متطورة، هدفها التقدم و خدمة مصالح الناس و تعليمهم! تبقى دولة بتضيف للتراث الإنساني و الحضاري العالمي!

دولة تستغل الشباب المتحمسين للبلد و عايزينها تبقي بجد بلد يتشرفوا بيها من غير أم الدنيا و هتبقى قد الدنيا و الكلام اللي مابيأكلش حمص ده! الشباب اللي معاهم العلم و الامل.. ليه بنخوهم و نكفرهم، ليه مانسمعش منهم و نحتويهم و نساعدهم؟ ليه بنقضي ع الامل؟