بمناسبة الصفحات الكتير و الظياط الأكتر عن العثمانين و امجادهم و البكا عليهم، أحب بس تعرف الكلمتين دول:
العثمانيين كانوا متقدمين و دولة عظمى مفيش شك لكن بالنسبالي وجود المماليك في مصر كان أفضل منهم بكتير.. ودا ليه اسباب، ايه هي؟
اني بربط ده بتأثير كل منهم (المماليك و العثمانيين) علي مصر تحديداً مش تقييمهم في العموم.. الاتنين كانوا سيئين لكن ضرر المماليك كان-في رأيي- أقل سوءاً من العثمانيين!
ليه؟
المماليك كانوا مجرد أمراء حروب و مرتزقة دفعتهم الظروف في اوقات ما أن يكونوا موجودين علي أرض مصر، و خدمت الظروف كمان بعضهم انه يوصل للسلطة و البعض الاخر وصل لها بنفسه نتيجة مؤامرة هنا أو وشاية هناك .. الخ
الأهم.. انهم اعتبروا نفسهم مصريين و حاولوا هيمنة الدولة المصرية.. أو عرشهم الموجود في مصر علي الاقل علي المنطقة و ده ضمن تأمين مصر لفترات طويلة من مخاطر الاحتلال العسكري الخارجي. كمان اهتم المماليك بالنواحي المعمارية و التراثية و سابولنا مجموعة من المساجد و المباني الاسلامية العظيمة زي اللي في شارع المعز مثلاً..
 |
| جانب من شارع المعز لدين الله بالقاهرة |
دا مش معناه ان الحياة كانت وردي طول الوقت.. كتير منهم فشل في ادارة موارد الدولة اقتصادياً و حصلت مجاعات و فترات كساد قاتلة.
اخوانا العثمانيين بقي احتلوا مصر حرفياً.. احتلال عسكري صرف. زي بالظبط ان تيجي السعودية الصبح تخش بجيش القاهرة و تقول ضمينا مصر للملكة .
موضوع الخلافة الاسلامية هنا مش مبرر و مش شايف انه سبب مقنع و مش حقيقي كمان.
مصر كان لها نظام حكم مستقر الي حد ما، اسلامي، لما الجيش العثماني بقيادة سليم الاول هزم الجيش المصري بقيادة قنصوة الغوري في معركة مرج دابق ثم طومان باي في معركة الريدانية و دبحوهم هم الاتنين و علقوا راس طومان باي علي باب زويلة.. و دي ممارسات غير اسلامية بالمرة.
.jpg) |
| لوحة توضح جانب من معركة الريدانية التي انتصر فيها سليم الأول على طومان باي و على أثرها احتل العثمانيين مصر |
كمان. اول حاجة عملوها انهم رحلوا قسراً كل العمال و الحرفيين المصريين لتركيا علشان يبنوا لهم الاستانة.. و دا اللي بتشوفه النهاردة ف تركيا من اثار و عمارة اسلامية هايلة.. علي العكس دا اثر علي مصر سلبا لما فرغها من مبدعيها.
العثمانيين ماقدموش لمصر اي شئ يذكر.. غير الخراب و الظلم و الجهل و الفقر و المرض.. دا حتى يا مؤمن لما نابليون بونابرت الامبراطور الفرنسي الاشهر اقتحم مصر بجيشه من الاسكندرية و احتل مصر ٣ سنين.. العثمانيين (اللي كانت مصر وقتها ضمن دولتهم) مارفعوش في وشه سكينة ولا قالوله كخ يا نابليون مايصحش.. رغم الاساطير و المعارك الفظيعة اللي بنعرفها عن العثمانيين و السلطان مراد زعبوله و السلطان محمد معرفش ايه..
 |
| لوحة توضح اقتحام نابليون و جنوده للجامع الأزهر و تدنيسه |
 |
| لوحة توضح نابليون يطل على مشارف القاهرة القديمة من على جواده |
ليست هناك تعليقات:
إرسال تعليق
اترك تعليقكك، شكراً