أولاً محدش يستظرف و يقول "فكرية" مين؟! O.O
الموضوع و ما فيه أنه بسبب الفتنة التي يدفعنا إليها الجهلة و المتشددين البعيدين كل البعد عن تعاليم الإسلام الحنيف و هم يظنون بجلهم انهم على حق، بعد حادث الاعتداء على أربعة من الشيعة بمصر.. كان هذا جزء من حوار...
محدش بيقول ان الاسلام وحش، بس المسلمين الوحشين هما اللي بيخلو شكل الاسلام أسوء مما تتخيل. و ده بسبب ايه؟؟؟؟؟؟؟؟؟؟؟ بسبب الجهل اللي مالي كل البلاد الإسلامية.. بسبب التطرف اللي شوه الاسلام و فرغه من مضمونه و رسالته.
على النقيض الدول اللا دينية بتطبق "حرفيا" اللي الاسلام بينص عليه فيما يتعلق بالمعاملات و علاقات الناس ببعض و بالمجتمع و الدولة.. علشان كدة هما فوق واحنا تحت..و صدق القائل: عندما سافرت رأيت إسلاما بلا مسلمين و ببلدي مسلمين بلا اسلام
لو حصل اخطاء من المسلمين فده مش معناه ان الاسلام دين وحش ودين جهل ودين تخلف......والعلمانية اللي في المانيا اللي بتحمي الحريات المسلمة القليلة هناك...استنى عليها شوية لما تستوي وشوف هايحصل ايه للمسلمين هناك.....ولو مش عايز تستنى بص لنموذج فرنسا والمسلمين اللي هناك بيحصلهم ايه.
بعيداً عن الشعارات علشان احنا كلنا مسلمين وعارفين ان الاسلام دين عظيم و كل حاجة...
الصورتين قدامك يا برنس و مش محتاجين ادلة علشان نقول ان معظم المسلمين في البلاد الاسلامية " ومصر منها طبعا" جهلة و أكثر ما يجهلوه الاسلام نفسه و ان كانوا حافظين القرآن فأغلبهم مش فاهم منه حاجة.. التطرف و الجهل و التمذهب.. شوه الاسلام تماماً تماماً و بقت الصورة الذهنية عن المسلمين في كل الدنيا النهاردة "ارهابيين- بدو-متخلفين- عبئ على العالم".
كل تحفظي على جملة الدولة الدينية "فاشلة لان اساسها الجهل والتخلف والرجعية الهمجية والارهاب "
ماتشتمش الدولة الدينية ......اشتم المتخلفيين الارهابيين.
مفيش اصلا حاجة اسمها دولة دينية! والرسول ماقلش احنا الدولة الدينية و لا من تبعه من الصحابة فترة الخلافة الراشدة ما كانش فيه مصطلح "دولة دينية" بالعكس المصطلح ده أوروبي 100% و كانت الدول الأوروبية هي اللي دول دينية لحد عصر النهضة.
في نفس الوقت انا فاهم قصدك لما بتقول دولة دينية- يعني دولة بتلتزم بقوانين و تعاليم الاسلام في معاملتها سواء بين الافراد و بعضهم او بين الدولة و الافراد.. بالله عليك اللي بيحصل في مصر من قبل السلفيين و الاخوان و تيارات السياسة المتأسلمة من تكفير و تقتيل و عداء ولغة خطاب فاحش و بذئ و عدواني و في كل الدول الاسلامية كمان: هل ليه اي علاقة بالاسلام من قريب او من بعيد؟! ولا يقربله!
كل اللي انت قلته انا معاك فيه طيب لو احنا عايزين نعمل دولة بتلتزم بقوانين و تعاليم الاسلام في معاملتها سواء بين الافراد و بعضهم او بين الدولة و الافراد..نسميها ايه غير الدولة الدينية او الاسلامية...
وكل العك اللي بيحصل ده تمهيد لهذه الدولة الدينية الاسلامية التي على منهاج النبوة.....اللي طبعا الناس اللي انت بتتكلم عنهم من السلفييين الحاليين والاخوان الحاليين وغيرهم .....اكيد مش منها ولا يقربولها زي مانت قلت فعلا...
خلافة!! هههههههههههههههههههههههههههههههههههههه
خلافة الأمويين ولا خلافة العباسيين ولا خلافة العثمانيين.. ولا الخلافة الراشدة؟ حتى الخلافة الراشدة تم إغتيال 3 من أصل 4 خلفاء و شهدت الفتنة الكبرى و ظهر الخوارج و اقتتل الصحابة و كُفِروا...الخ الخ
أما منهج النبي، فالنبي كان يوحى إليه.. و كانت الأزمات في عهدة تحل معظمها بتدخل إلهي.. و في غير ذلك كان الأمر بالتشاور بين الناس فيم يناسب زمانهم. يا اخي ليه قال الرسول: انتم أعلم بشؤون دنياكم؟؟! ليه عمر بن الخطاب لما لقى الناس بتقارن حكمه بالنبي قال ان النبي يوحى اليه و بوفاة الرسول انقطع الوحي و الأمر من بعده للاجتهاد؟!
يا أخي ليه معجزة القرآن في أنه مناسب لكل الأزمان؟ يا أخي بتنظر لنجاحات دول "الخلافة" و عاوز تبقى زيها و انت بتطالب بدولة مواصفاتها أصلا غير مواصفات دول المسلمين الأوائل؟!! #عبث
To be Continued!..
ليست هناك تعليقات:
إرسال تعليق
اترك تعليقكك، شكراً