رغم انف الحاقدين

أحد الأصدقاء كتب (مصر اسلاميه رغم أنف الحاقدين)...تعليقا على أحداث الجمعه 29 يوليو 2011 في ميدان التحرير فيما عرفت بجمعة الشريعه أو جمعة الإسلاميين و كان هذا ردي:

  

     

احنا كنا كفرنا امتى؟! ماهي مصر دوله اسلاميه بس الاسلام مش معناه انى ارتد للعصور الوسطى ولا معناه ان اللى مش موافقنى فى الرأى يبقي كافر و ملحد و فاسق ، الاسلام بيبني مش بيهد، الاسلام سماحه و اعتدال مش "غشوميه و سطحيه" الاسلام مش بيقولى أكون... إمعه ...انا عارف ان الجهل اللى زرعه و كبره حسنى مبارك و نظامه فى مصر مسح كل درجات الثقافه و الوعى الدينى و السياسي و حتى الاجتماعى عند حوالى 70 % من المصريين ..
بس ابسط حاجه ان الواحد يعرف دينه و الدين مش كده كل تيارات الاسلام السياسي دي بتشوه الاسلام الحقيقي و هي تيارات انتهازيه بتخدم مصالحها لا مصالح الوطن ولا مصالح الدين ممكن مصالح العلم الأخضر المرفوع النهارده فى التحرير بدل علم مصر...بدل العلم اللى فضلت 16 سنه اقف قدامه كل يوم الصبح اقول (تحيا جمهورية مصر العربيه) ! ماظنش ان عمر عبد الرحمن هو الاسلام!

ماظنش ان الدين قال في يوم تكفر و تقتل المختلفين معاك و عنك، ماقالش الاسلام انك "مش انت اللى ادرى بشؤون دنياك" وان ناس يفرضوا وصايتهم عليك و يقولولك انت مؤمن ولا مش مؤمن... فيه ناس ظالمه بتستخدم عاطفة الدين علشان اغراض تانيه! 

مفيش مسلم هيكره الشريعه الاسلاميه لاننا طول عمرنا عايشين بالشريعه الاسلاميه ... الحق على اللى مفهم الناس العكس.... الشريعه قانون و فطره و كل مسلم ماشي عليها.. بس حكم الشريعه مش معناه تمسك كرباج و تقول لواحد صوم بالعافيه او صلي بالعافيه ... ولا دا اصلا هدف الاسلام ولا رسالته...الشعائر علاقه بين كل واحد و ربنا محدش وصي على حد و كل المسلمين سواسيه! بس الوصايه و النقاش و الجدال و حتى الخناق - لوحبيت- لازم يكون حوالين ازاى تبني! ازاى تعمر! الحق على اللى مش مفهم الناس ربنا خلقنا ليه؟؟

 اعمار الأرض هو الطريقه التى نعبد بها الله و هي فلسفة الخلق كون الانسان هو خليفة الله فى الأرض!

وردا على تعليق صديقي: "اللى حصل النهارده رساله قويه للناس اللى عايزه تلتف حول الاستفتاء وتفرض رايها بالقوه رغم ان صوتهم كان اقليه فى الاستفتاء"  استغربت من العلاقه بين استفتاء سياسي و الاسلام!! فوضح لى :

"العلاقه ببساطه شديده بين الاستفتاء والاسلام هى ان كل القوى الاسلاميه كانت خايفه من العالم الزايطه زى ساويرس ومن هم على شاكلته بالغاء الماده التانيه من الدستور فشافت ان التعديلات دى كافيه جدا لحد ما يجى مجلس شعب منتخب منى ومنك ومن كل الشعب ... يجى وهو اللى يحط الدستور الجديد بدل ما يجى مجلس حكماء وهو لايمت للحكمه بشىء كان منهم ساويرس وناس بتنتمى للاسلام اسما بس , ويحطو دستور جديد يلغى فيه هويتنا الاسلاميه وما يبقاش فيه ذكر ان الاسلام هو المصدر الاساسى للتشريع".

و كان ردى:

الاستفتاء مكانش على هوية مصر الدينيه خالص (دا اللى الناس الظالمه ضحكوا بيه ع الشعب ) دا كان على 9 مواد بس خاصه بتنظيم الحياه السياسيه يعني "ترقيع" للدستور القديم و بعدين المجلس العسكري بعد كدا ضربنا كلنا على قفانا و عمل اعلان دستوري ب 60 ماده ولا كأن كان فيه استفتاء اساساً، فزاعة " الحقوا دول بيحاربوا الاسلام" مش حقيقيه محدش مسلم في بلد اسلاميه ضد دينه! بس فيه ناس بتستخدم الموضوع دا لأهداف تانيه.. مثلا : الجماعه الأسلاميه اللى قتلت السادات، اسمها اسلاميه! بس هل تقدر انت تقول انا بأيدها لمجرد ان اسمها اسلاميه بس؟! و ماتشوفش كل البلاوى السودا اللى عملوها بناءً و اعتماداً على "فكر اسلامي مشوه" ؟!!

موضوع الدستور الجديد دا كان مطلب من المطالب السبعه المعلن عنها من 2010.. و دستور جديد مش الغرض منه تغيير دين الدوله خالص دي حاجه مفروغ منها و مش محل نقاش و اشك ان اى حد عاقل طلع قال من قريب او من بعيد ان دين الدوله او ان الاسلام مصدر التشريع الرئيسي موضع تغيير! بس فيه ناس بتوصل للشعب الاحساس دا علشان تعمل فزاعه دينيه و تلعب على المشاعر الدينيه..علشان تستقطب الجماهير و المؤيدين ليهم من باب انهم حماة الاسلام اللى بيدافعوا عنه من الناس الملحدين الكفار الليبراليين الشيوعيين العلمانيين الكفره !!!

الدستور الجديد هدفه الحريه السياسيه، حرية الرأى و التعبير، ضمان الحقوق، تقليص سلطات المسؤليين، زيادة سلطات الشعب من خلال البرلمان، استقلال القضاء، الفصل بين السلطات، الكرامه الانسانيه بصفه عامه، صيانة الحقوق الاجتماعيه وكمان المفروض عدم استغلال الاسلام استغلال سياسي... الخ الموضوع ملوش اي دخل بالدين بس الواحد لازم يفكر ليه الناس اللى عمالين يخوفونا ع الدين دول بيعملوا كدا و لمصلحة مين القلق دا ؟