قبل ما تتكلم.. اقرأ
مش هاعملك مقدمات ولا أى تمهيد و بعدين أقولك أنهم شيوخ الأوقاف.. وشيوخ الهرتله فى الفضائيات!! الشيوخ اللى كان جهاز أمن الدوله المُنحل مؤخرا ً بيحركهم زي عرايس الماريونيت...الشيوخ اللى وصلت بيهم النطاعه و البجاحه انهم "يأيفوا" الدين على هواهم أو على هوى الناس اللى بيحركوهم و بيأمروهم.
رجعوا تانى و صوتهم طلع- التعديلات الدستوريه..ماشي الحال قول موافق ..قول مش موافق.. مش دي القضيه! لكن يوصل الإستهبال و البجاحه و الهرتله لدرجه ان الشيوخ الأفاضل يقولك يا تروح تقول (نعم) يا تبقي عدو الله ؟؟ و حياة خالتك؟؟!!! لو ما كنتش شفت ده بنفسك ف انا شوفته النهارده للأسف فى خطبة الجمعه!! انا أفهم ان الشيخ ممكن يفتى فى أحكام الدين و مش كل الشيوخ بالمناسبه تقدر تعمل الحكايه دي..و طبعا الفتوى مابتبقاش بالمزاج..فيه قرآن و فيه سنة...الخ
لكن انك كشيخ تفتى فى السياسه .. وتلزق الدين فى رأيك علشان يبقي هو الصح ؟طب ليه؟ و ازاى؟ و على أي اساس؟ مش هما دول الشيوخ اللى كانوا بالليل و النهار بمناسبه و من غير مناسبه بيشكروا و يمدحوا حكمة و رجاحة عقل السيد الرئيس المخلوع؟!! مش هم دول اللى من أول الثوره لحد ما حسنى مبارك غار فى داهيه كانوا مصدعين دماغنا بالخروج على الحكام و ازاى نعمل كده و عيب و حرام و الإستقرار هايروح و اوعوا و ارجعوا ...الخ بمناسبة الإستقرار اللى خوتوا دماغ الواحد بيه..الإستقرار.. طالعين نازلين يقولوا استقرار..بغبغانات بتتكلم و تعيد و تردد اللى بتسمعه من غير مايفهموا أى حاجه!!
استقرار ايه ده اللى يبقي معناه الجمود و الرجوع و الجهل؟؟ أمُال الثوره دي قامت ليه؟؟ ده أول حاجه اتقالت: الشعب يريد اسقاط النظام.. حسنى مبارك يمشي و دستور جديد !!!
الكلام عن الإستقرار اللى بيقصدوه ( و اللى ماحدش دلوقتى يختلف عليه أصلا) ..ما يكشف جهلم المُزرى فى السياسه!! لأن التصويت ب (نعم) للترقيعات الدستوريه...سيأتى بانتخابات كل شهرين..فى فوضى و رعونه سياسيه عمرها ماحصلت.. انتخابات شعب ثم شورى ثم رئاسيه.. كل شهرين. من الأخر كده هايبقي كله (سلق بيض) .
و لذلك فان من سيصوت ب (لا) هو فى الأساس يريد التأنى فى هذه المرحله و العمل بشكل صحيح لاعداد دستور جديد يضمن لمصر بداية عهد جديد و يضمن للجميع التساوي فى الفرص السياسيه عند إجراء أى إنتخابات!!
يعني العكس تماما ً
أنا افهم إن الإخوان المسلمين يوافقوا ع التعديلات لأن التعجيل بانتخابات مجلس الشعب فى صالح حزب الإخوان الجديد و الجماعه نفسها بالإضافه لبقايا الحزب الوطنى طبعا ً (هم هيلاقوا فين أحلى و لا أجمل من دستور 1971- كتالوج صنع الطغاه) .. ماشي الحال هم أحرار...و لعبة السياسه كده!! الديموقراطيه بتقول يختاروا اللى عايزينه.
لكن اسمحلى أرجع لشيخ ماسك الميكروفون فى خطبة الجمعه يأمر الناس الغلابه اللى بتصلى انهم يروحوا يصوتوا ب (نعم) يا اما يبقوا من أعداء الله!!!! ازاى؟؟ يا تقول نعم يا تبقي بتحارب الإسلام ؟!!!! إزااااااااى ؟؟؟؟؟؟؟؟؟؟؟ ده بيقول بالحرف لو قلت (لا) يبقي آثم قلبك!!!! ياااااااااه على النصب باسم الدين!! الشيخ ده وصل للمكان ده ازاى و هو كده؟
رأيك السياسي يا عم الشيخ احتفظ بيه لنفسك ماتدخلش فيه الدين و تحرف الدين على هواك و تضلل الناس من على المنبر- منبر رسول الله
اللى انا أفهمه ان اللى يقول رأيه يقوله بناء على معرفه، يعني جاب التعديلات و قرأها و فهمها و لو مافهمش فيها حاجه يدور و يقرأ أو يسأل حد متخصص فى السياسه..و كمان يقرأ الدستور القديم اللى عايزين يرجعوه ده و يشوف كل " العك" اللى فيه و بعدين يقرر...
مش يقولى اصل الشيخ فلان الفلانى قال كذا يبقي انا شيخ و هو شيخ يبقي نمشي على كلام بعض ؟؟!!!!! ايه القرف ده ؟؟؟
هو الدين امتى قال للناس تبقي امعات و تبقي جهله و تستخدم الدين و القرأن و السنه فى غير موضعها ؟؟
انا بشوف اللى يروح يقول رأي من غير ما هو فاهم حاجه (سواء قال نعم أو لا) مايفرقش كتير عن الحمار يحمل أسفارا و عامل زى اللى سايق عربيه و هو مش عارف يسوق و ماشي يدهس فى الخلق و يكسر فى المحلات.
يا ناس!! يا أى حد ممكن يهتم و يتألم لحال الأغلبيه من المصريين-
محو الأميه (بكل أنواعها) هو الحل
ليست هناك تعليقات:
إرسال تعليق
اترك تعليقكك، شكراً