سري جدا ً إلى البحر

و بَاقُولُه يَا بَحر ليه المُوج فِى عِز الهُوج مَا بِيخَلِصْش ؟

و المِلح سَد وِدَانَك، و دَانَك لَجل مَا تخَلِصش !! ـ

 يَا بَحر، كَام ألف بِت

زَغزَغت رِجلِيهُا و رَفَعت عَنهَا الحِجَاب

و لَزَقت فُستَانهَا بالعَانِى عَلَى ضَهرَهَا

وجَرَحت رِجْل الوَاد اللى جِرِى فِى ضَهرَهَا

وعَمَلت مِلحَك دَوَاَ واللى جِرَاحُه هَوَى

مَالهُوش طَبِيب غِيرَك !! ـ

طَب لِيه بِتبخَل عَلَيَا؟

مَع إِن " نَــانَــا " صَبِيَه

زَغزَغت رِجلِيهَا ورَفَعت عَنهَا الحِجَاب

ولَزَقت فُستَانهَا بالعَانِى عَلَى ضَهرَهَا

ودَبَحتِنِى فِى مَهرَهَا و دَفَعتِلَك رَاضِى

خَلِيتلِى حُبِى قَضِيَه و عَمَلتِلِى قَاضِى

و كَوِيت بِملحَك جَرحِى كِيف الدَبْح

مِن مِيتَى يَا بَحر الِجرَاح بطِيب بِحَبِة مَلح؟!! ـ

و أنا أصلِى واخد ع الـوَجَّع

و أمَّا الجِـرَاح بتْصِيـب جَـدَّع

بيصِير وجَعْهَا بــــ مِيت وَجَّع

تعرف يا بحر الـ ميت وَجَّع ..؟

وَجَّع اللى حَبيِتهَا وسَابِتنى
و وَجَّع اللى بعنِيها سَبِتنى 

و وَجَّع اللى عَمَلِت مِنى رَمل فى قَعر جُوفَك رسَّبتنى

و تُسعُمِيت مِليُون وَجَّع للذكرَيَات

أصْل المحبه يا بحر مِش فَتره وتِعَدى

دِى عُمر شَايِل صُوت هِزَارِى و غُلب جَدّى

فِكر طَايِح يُوم يِجيب و شُهور يِوَدِّى

و تُسعُمِيت مِليُون وَجَّع

عَدَد المحَاره و الوَدَع

عَدَد الكَلام مِن بِين شَفَايِفهَا الجُمَال

عَدَد الشَمَاسِى و الكَرَاسِى و البَنَات

عَدَد الرِمَال عَدَد المطَر يا أبو قَلب أقسَى مِن الحَجَر

كُل اللى فَاكرِينَك بتجَمَّع للحَبَايِب شَملُهم

عَـــــــــــالَــــم بَـــــــــقَــــــــــــرْ

مَا أنَا جِبتَهَالَك .. مِشْ جِبتَهَالَك ؟!!! ـ

شَهِــِد الشَمس اللى لِسّه سَمَارهَا فُوق ضَهرِى تِقُولَك

إِنى يَا بَحر إِئتَمَنتَك، جِبتَهَالَك !!ـ

ولا لِيه؟!! شَّهـِد رِمَالَك

عَلِّى صُوتَك سَمَّع الرَمل اللى مَدبُوح مِن قَسَاوتَك

و إِندَاهُه.. و إِن كَان يِجَاوِب إسألُه:ـ

فِين قُصُور الوَاد دَاهُه؟!! ـ

هايقُولُولَك ما إنت يا بَحر اللى هَدِيتهَا و سَوِيتهَا بِبَاقِى الشَط

هايقُولُولَك هُوَ.. هُوَ المُوج يا بَحر

زَى مَا جَمَّع حَبَايِب زَى ما كَسَر قُصُور

بَس النُوبَه دِى يا بَحر مُوجَك القَاسِى كَسَرنِى

هُوَ أَنا نَاقِص كُسُور؟!!ـ

لَو تِعَرِينى يَا بَحر تِلقَى جُوَايَا بَنَات مَالْهَا عَدَد

و لَا إِتكَسَرتِش !!ـ

زَى مَا تقُول جِسمى نَحَس مِن الحَريِم و بَقِيت وَتَـــدّ
بس النُوبَه دِى مَا إنتَصَرتِش!!ـ

باَعتِرفلَك يَا هَوَا البَحر إِنى مَغلُوب النُوبَه دِى

بَس خَلِيك وَاعِى دَايماً و إفتِكِر مِين اللى بَادى

ومِن اللِيله دِى لا إِنتَ صَاحبِى و لا أعرِفَك

إِيَاك تِشُوفنِى بِبِنتْ حِلوَه و تُطلُب إِنى أعَرِفَك

صَبرَك عَلَيا

و هـاكشِفَك و هــاجرِسَك و هـاجَرِفَك و هـاجَوِفَك و هـاكَتِفَك

كِيِفْ الذَلِيل!!ـ

مِن اللِيله دِى سَمَاك يَا بَجر هتِبقَى لِيل

مِن اللِيله دِى هـأطفِى شَمسَك و أطمِس الدُنيَا ونَهَارهَا

" نَـــــانَـــــا " مَـــــاتِـــــت

بَس فَاضِل لِسَه نَارهَا

و العَزَا عَالِق مَا بِينِى و بِينَك إنتَ

والله مَا هَقبَل عَزَاك

قَبل مَاخُد بإيدِى.... تَـــــــارهَـــــا

================================================

قصيده ل هشام الجخ

لمشاهدة القصيده القاء هشام الجخ

 برنامج العاشره مساءً

http://www.youtube.com/user/hishamelgakh#p/u/19/ZML9G5-7jlc