أبوتريكة و اللي ليه ظهر !!!

في مرة زمان ايام الكلية (مش من زمان قوي يعني) افتكر ان واحد صاحبي قاللي جملة لسه فاكرها لحد دلوقتي ... كنت اول مرة بسمع الجملة دي مع انها مشهورة جدا خصوصا في بلدنا الغالية :)

الجملة كانت (اللي ليه ظهر مايضربش علي بطنه) وطبعا ايامها كان بيقولهالي علي موقف حصل في الكلية بتاعتنا وقتها و ما أدراكم ما المواقف اللي من النوعية دي :) خصوصا في كلية زي الكلية اللي كنا فيها.

المهم ان الجملة دي في بالي علطول ، مايعديش ياعيني كام يوم الا و الاقي موقف يخلي الجملة تنط علطول قدامي علشان كده مش ناسيها و من كام يوم وانا بتفرج علي ماتش مصر و السودان في بطولة أمم أفريقيا زي مانتم عارفين ابوتريكة (الراجل البركة) لزق السودان الجون التاني لما كانوا دايسين فينا و كان شكلنا وحش بالجون اليتيم اللي جايبينه من ضربة جزاء....انا كنت "مزقطط" و قلت اخيرا ربنا فرجها و زي ماكلكم شوفتوا ان أبوتريكة رفع "التي شيرت" علشان يبين جملة

تعاطفا مع غزة SYMPATHIZE WITH GAZA

والله انا فرحت أكتر لما شوفت الجملة دي علي تي شيرت ابو تريكة مع انها ماكانتش باينة قوي في التليفزيون بس كلمة "غزة" كانت باينة ودي لوحدها كانت كفاية.

المهم ابوتريكة جاب كمان جون و الماتش خلص و فرحانين ومزقططين وكل حاجه...و ابص بعد كده في الأخبار و البرامج و المواقع الرياضيه العربية و الأجنبية الاقي الدنيا قامت و مقعدتش...قال ايه ازاي ابوتريكة يتجرأ ويعمل كده....دي كارثة...دي نكبة !!! ازاي يتلاعب بقوانين الفيفا ... ده لاعيب عنصري ....و كان ناقص يقولك ده ارهابي وتبع بن لادن !!!!!!!

أنا مكنتش مصدق و بقول (هو فيه ايه ؟!) -طبعا مش بتاعت محمد فؤاد و أحمد ادم :) - هي المهلبية و الكوسة برضه ممكن تخش في الحاجات دي... و افتكرت الواد الحيوان المتخلف بتاع غانا اللي اسمه "بانتسيل" لما رفع علم اسرائيل عشان فرقته جابت جون (اللي هي غانا) في كاس العالم و الناس كلها (صكتم بكتم) ولا حد قاله عيب ولا كخ ولا اي حاجه.

اللي زاد وغطي بقي بعدها بكام يوم واللي بجد فرقعني من الغيظ بغض النظر ان اسرائيل طلبت من الفيفا قال ايه وقف أبوتريكة...

لقيت بسلامتهم موقع "جوجل"

Google

حذف الصور بتاعت تريكة و هو رافع التي شيرت علشان يبين

الجملة -تعاطفا مع غزة- من الموقع بسبب ضغوط اسرائيلية، ساعتها بس عرفت انه فعلا

(اللي ليه ظهر مايضربش علي بطنه) ...مكانتش للكلية بس، لأ ده في العالم كله كمان و تحيا الأمة العربية اللي مالهاش ظهر و بطنها مكشوفة والعالم كله بيشلفط فيها.

و يارب لما المنتخب بتاعنا يرجع مايقبضوش عندنا علي ابو تريكة و يودوه جوانتانمو او يخترعوا له حاجة ويقولك زور استمارة انضمامه للنادى الأهلي :) ولازم يتحبس ماهي العالم دي واصلة حتي عندنا و ربنا يستر !!