أخيرا " بلوج" :)

سلام عليكم :)

من زماااااان قوي و انا بقرأ مدونات و بتفرج و بشوف الناس بتكتب ايه و بيتكلموا في ايه و عايزين يفضفضوا في ايه... و كان جوايا كده زي ماتقولوا رغبة " مكبوتة" :) اني اعمل مدونة و افضفض انا كمان يعني (حاجة كده من نفسي) بس كنت باتردد او بطنش ...مش عارف . المهم اني اخيرا الحمد لله حطيت حجر الأساس " للبلوج" بتاعتي :)

انا اصلي عاجباني فكرة ان الواحد ممكن يفضفض كده ويقول كل اللي جواه و كمان يشوف تعليقات الناس عليها و يشوف نفسه دماغه مظبوطة ولا بقي متخلف ولا دماغه لسعت ولا ايه بالظبط؟؟!! :) اصل بيني و بينكم العيشة في البلد دي مش مضمون تأثيرها علي النفوخ :)

انا ناوي بقي بأذن الله افضفض في كل اللي عايز اخرجه من جوايا .... اصل ماليش قوي في حاجة معينة و لا انا عارف لنفسي اهتمام في حاجة .... يعني هتبقي كوكتيل :)

المهم انا اليومين دول فيه حاجتين مبسوط منهم اول حاجه (باعتبار ان ليا شوية في الكورة يعني) بطولة امم افريقيا... كل شوية بتقرب اهي و ربنا يسهل بقي و منتخبنا يعمل حاجه.

ثاني حاجة بقي: المقالات بتاعت "هيكـــل" اللي بدأت المصري اليوم تنشرها....و الله مش عارف ليه المقالات دي عاملة شوية شعشعه كده؟ يمكن علشان "هيكـــل" كصحفي مخضرم اسلوب كتابته هو اللي بيشد...او يمكن الموضوع اللي هو كاتب فيه اللي بيشد؟؟ مش عارف.المهم انه راجل تقيل وله وزن جامد.

ماعلينا :) واضح ان حجر الأساس طلع كبير قوى و المسائل كانت هتهرب و كنت هبدأ أرغي في مواضيع بس انا بقول استني الأول اشوف حد هيعدي الناحية دي عند " البلوج" دي ولا ايه ؟ !! :) اصل باعتباري مبتدأ يعني مش عارف اللي هيشوف البلوج دي هيوصلها ازاي اساسا... :))

يلا كفاية كده احسن حجر الأساس بتاع "البلوج" بيكبر و كده هيحتاج اسمنت وحديد كتير و زي مانتم عارفين الأسعار رخيصة و الحياة (بامبي)

و هحتار اجيب الحاجات من عند مين ولا مين :))

علي ما تطلع حاجه من دماغي بقي اللي عنده نصيحة مايبخلش عليا بيها :)